Alþýðusamband Vestfjarða var stofnað á Ísafirði 20. mars 1927. Í fyrstu nefndist það Verklýðssamband Vesturlands (VSV), en á þriðja þingi þess árið 1931 var nafninu breytt í Alþýðusamband Vestfirðingafjórðungs (AV) og árið 1942 á 8. þingi sambandsins í Alþýðusamband Vestfjarða (ASV) sem það hefur heitið síðan.
Félögin sem stóðu að stofnun sambandsins voru Verkalýðsfélagið Baldur, Ísafirði, Jafnaðarmannafélagið Ísafirði, Verkalýðsfélag Önundarfjarðar, Sjómannafélag Ísfirðinga, Verkalýðsfélag Hnífsdælinga og Verkalýðsfélag Bolungarvíkur. Árið eftir bættust við Verkalýðsfélagið Brynja á Þingeyri og tvö nýstofnuð félög, Verkalýðsfélag Álftfirðinga og Verkalýðsfélag Patreksfjarðar.
    Verkalýðssamband Vesturlands tók við blaðinu Skutli á Ísafirði árið 1927 og gaf það út til ársins 1944. Þá var forseta sambandsins og ritstjóra Skutuls, Hannibal Valdimarssyni afhent blaðið til fullra umráða. Þremur árum síðar varð Skutull málgagn Alþýðuflokksins.  Fram til ársins 1942 voru Alþýðusambandið og Alþýðuflokkurinn eitt og hið sama, en eftir það varð verkalýðshreyfingin aðskilin stjórnmálaflokknum.
    Alþýðusambandi Vesfjarða - ASV - kom á sameiginlegum samningum landverkafólks og sjómanna á öllum Vestfjörðum um og eftir 1950. Síðan hafa aðildarfélög ASV yfirleitt gengið sameinuð til samninga undir forystu sambandsins.
    Framan af hafði sambandið enga fasta skrifstofu, aðra en heimili forseta þess, en síðar fékk það aðstöðu í Alþýðuhúsinu á Ísafirði. Eftir 1970 starfrækti ASV skrifstofu í Alþýðuhúsinu ásamt verkalýðsfélögunum á Ísafirði uns starfsemin var flutt árið 1989 í hús Verkalýðsfélagsins Baldurs í Pólgötu 2.
    Á áttunda áratugnum beitti ASV sér fyrir uppbyggingu orlofshúsabyggðar við Flókalund í Vatnsfirði á Barðaströnd. Um tíma átti sambandið ásamt ýmsum verkalýðsfélögum á Vestfjörðum og víðar um land jafnframt Hótel Flókalund.
    Alþýðusamband Vestfjarða beitti sér fyrir sameiningu verkalýðsfélaga á sambandssvæðinu, sem varð til þess að Verkalýðsfélag Vestfirðinga var stofnað árið 2002 af níu félögum á Vestfjörðum. Fimm félög bættust í hópinn á næstu misserum, þannig að nú nær sameinað Verkalýðsfélag Vestfirðinga yfir nær allt félagssvæði ASV.
    
    Forsetar sambandsins
        Ingólfur Jónsson        1927-1931.
        Finnur Jónsson        1931-1935.
        Hannibal Valdimarsson    1935-1954.
        Björgvin Sighvatsson        1954-1970.
        Pétur Sigurðsson        1970-

Þing Alþýðusambands Vestfjarða
    Stofnfundur 20. mars 1927.
    2. þing VSV  7. apríl 1929.
    3. þing VSV  27-28. janúar 1931 (nafnabreyting).
    4. þing AV  19. febrúar 1933.
    5. þing AV  27. febr-1. mars 1935 á Þingeyri.
    6. þing AV  26.-28. september 1936 í Bolungarvík.
    7. þing AV  4.-6. júní 1938.
    8. þing AV  1.-4. apríl 1942 (nafnabreyting).
    9. þing ASV  5.-6. júlí 1944.
    10. þing ASV  25.-27. júní 1948.
    11. þing ASV  27.-28. júní 1950.
    12. þing ASV  26. september 1952.
    13. þing ASV  26. september 1954.
    14. þing ASV  5. október 1956.
    15. þing ASV    1958.
    16. þing ASV  20.-21. september 1960.
    17. þing ASV  27.-28. september 1962.
    18. þing ASV  24.-25. september 1964.
    19. þing ASV  21.-22. september 1967.
    20. þing ASV  24.-25. september 1970.
    21. þing ASV  20.-21. október 1973.
    22. þing ASV  10.-11. október 1975.
    23. þing ASV  12.- 13. nóvember 1977.
    24. þing ASV  20.-21. september 1980 í Flókalundi.
    25. þing ASV  28.-29. maí 1983.
    26. þing ASV  23.-24. nóvember 1985.
    27. þing ASV  7.-8. maí 1988 í Flókalundi.
    28. þing ASV  27.-28. október 1990.
    29. þing ASV  17.-18. október 1992.
    30. þing ASV  12.-13. nóvember 1994.
    31. þing ASV  16.-17. nóvember 1996.

Prentaðar heimildir um Alþýðusamband Vestfjarða
Verkamannasamband Íslands 20 ára. Afmælisrit. Reykjavík 1985. (VMSÍ-fréttir, afmælisútgáfa, 6.árg. 1.tbl., ágúst 1985).   
Viðtal við Björgvin Sighvatsson, fyrrv. forseta ASV. „Verkalýðshreyfingin verður að spyrna við fótum." Bls. 48-51.
Viðtal við Pétur Sigurðsson, forseta ASV. „Menn eiga að geta sagt með  stolti að þeir séu verkamenn." Bls. 92-95.
Sigurður Pétursson. „Hannibal Valdimarsson." Andvari nýr flokkur XLV, 128. ár, 2003, bls. 11-87.