Fimmtudaginn 10. nóvember 2011 urðu tímamót í uppbyggingu öldrunarmála á Vestfjörðum. Þá var undirritað samkomulag á milli Ísafjarðarbæjar og ríkisstjórnarinnar um fjármögnun nýs hjúkrunarheimilis á Ísafirði. Langþráð baráttumál er loksins í höfn. Nýtt hjúkrunarheimili mun rísa frá grunni á Ísafirði á næstu tveim árum. Þetta er mikið fagnaðarefni fyrir alla Ísfirðinga; íbúa Ísafjarðarbæjar og nágranna þeirra við Ísafjarðardjúp.

Guðbjartur Hannesson velferðarráðherra hefur reynst haukur í horni við að koma þessu máli í gegn og ríkisstjórnin, fyrsta velferðarstjórn jafnaðarmanna á Íslandi, hefur staðið við heit sín um að koma áratugagömlu baráttumáli Ísfirðinga á rekspöl. Baráttumáli sem ekki tókst að sigla í höfn á tímabili fljótandi fjármagns í svokölluðu góðæri. Fjármögnun byggingarinnar er nú klár og næstu skref í höndum heimamanna, að hanna og bjóða út byggingu hjúkrunarheimilis fyrir 30 heimilismenn, sem byggt er á nýjustu stöðlum um umönnun og aðstöðu fyrir aldrað fólk. Bygginganefnd á vegum Ísafjarðarbæjar þarf nú að bretta upp ermar og einhenda sér í að hefja framkvæmdir eins fljótt og verða má á næsta ári.

Bygging nýs elliheimilis og síðar hjúkrunarheimilis hefur verið á dagskrá bæjarstjórna í Ísafjarðarkaupstað og síðar Ísafjarðarbæjar í meira en fjóra áratugi. Þess má geta að á 100 ára kaupstaðarafmæli Ísafjarðarkaupstaðar 1966 var samþykkt á sérstökum hátíðarfundi bæjarstjórnarinnar 26. janúar að byggja nýtt elliheimili fyrir 40 vistmenn. Ekkert varð úr framkvæmdum. Þá má minnast þess að um áratugaskeið greiddu Ísfirðingar og aðrir sem sóttu bíósýningar í Ísafjarðarbíói hluta af aðgöngumiðaverði í sérstakan elliheimilissjóð. Sjóðurinn var síðar notaður til að fjármagna hluta byggingar íbúða fyrir aldraða á Hlíf á Torfnesi. Elliheimilið í Mánagötu var lagt niður í kjölfarið og sett á fót þjónustudeild á 4. hæð á Hlíf. Sú ákvörðun var umdeild á sínum tíma. Þjónustudeildin var lögð niður á síðasta ári, án þess að nýtt úrræði væri komið í gagnið. Ákvörðun ríkisstjórnarinnar að fjármagna nýtt hjúkrunarheimili mun leysa þann vanda, sem af þessu hefur leitt.

Ísafjörður var á árum áður í fararbroddi á Íslandi í uppbyggingu öldrunarþjónustu. Þegar jafnaðarmenn komust til áhrifa í Ísafjarðarkaupstað árið 1921 var eitt af því fyrsta sem þeir gerðu að setja á fót elliheimili á vegum bæjarins á jarðhæð Hjálpræðishersins, sem þá var nýbyggður. Það var fyrsta elliheimili á landinu sem stofnað var og starfrækt af bæjarfélagi. Var það skýrt dæmi um nýjar áherslur jafnaðarmanna í samfélaginu. Ekki var þar staðar numið, því þegar nýtt sjúkrahús reis á Ísafirði árið 1925, undir forystu Vilmundar Jónssonar læknis, var elliheimilið flutt yfir Mánagötuna, úr Herkastalanum í gamla sjúkrahúsið. Þar starfaði elliheimilið allar götur síðan fram á níunda áratug síðustu aldar, þegar Hlíf var tekin í notkun. Frá þeim tíma hefur lítið gengið eða rekið í byggingarmálum hjúkrunarheimilis , fyrr en nú.

Það er því mikið ánægjuefni að fjármögnun nýs hjúkrunarheililis fyrir 30 heimilismenn skuli vera skjalfest og undirritað. Með því er tryggt að aldraðir Ísfirðingar, sem ekki eiga þess kost að sjá um sitt heimilishald sjálfir, geti í framtíðinni búið við traustar og öruggar aðstæður í heimilislegu umhverfi með nútímalegri þjónustu og aðbúnaði. Þannig getum við sem samfélag boðið öldruðum þær aðstæður sem sú kynslóð á skilið, sem nú fetar sín síðustu ævispor. Kynslóðin sem lagt hefur grunninn að Íslandi nútímans með mikilli vinnu og verðmætasköpun, sem við eftirkomendur njótum góðs af í velferðarsamfélagi nútímans. Með þessu móti getum við sýnt hug okkar, eins og jafnaðarmenn gerðu árið 1921 þegar þeir stofnuðu fyrsta elliheimili í bæjarfélagi á Íslandi til að skapa öldruðum mannsæmandi ævikvöld.

Til hamingju Ísfirðingar allir, - bæði íbúar Ísafjarðarbæjar og nágrannar þeirra í Súðavík og Bolungarvík!

Sigurður Pétusson, bæjarfulltrúi í Ísafjarðarbæ
Deila á Facebook