Í ýmsu hefur verið að snúast hjá lögreglunni á Vestfjörðum fyrstu viku ársins. Sex ökumenn voru kærðir fyrir of hraðan akstur í liðinni viku og sá sem hraðast ók var stöðvaður á Steingrímsfjarðarheiði á 109 km hraða þar sem hámarkshraði er 90 km.

Tveir ökumenn voru handteknir á Ísafirði  grunaðir um akstur undir áhrifum fíkniefna.  Annar var stöðvaður rétt fyrir miðnætti á fimmtudag en hinn um kl. 14:00 á föstudaginn.   
 

Tvö umferðaróhöpp voru tilkynnt í vikunni.  Annað var minniháttar en um hádegisbil á sunnudaginn valt bifreið út af veginum um Mikladal milli Patreksfjarðar og Tálknafjarðar.  Ökumaður var einn í bifreiðinni og var hann fluttur á sjúkrahús til skoðunar en reyndist ekki alvarlega slasaður.  Mikill krapi var á veginum og er talið að ökumaður hafi misst stjórn á bifreiðinni af þeim sökum.  
 

Haldið var áfram átaki  um eftirlit með skoðun ökutækja.  Lögreglumenn á Hólmavík gáfu eigendum 17 bifreiða sjö daga frest til að færa bifreiðar sínar til skoðunar.  Ef slíkri boðun er ekki sinnt eru skráningarnúmer bifreiðanna fjarlægð.    

Á laugardeginum tapaðist rauður verkfærakassi og loftpressa á leiðinni frá Brú í Hrútafirði til Hólmavíkur.  Eigandi þessara muna var á ferð vestur á pallbifreið og varð fyrir því að hleri opnaðist og verkfærin féllu af.  Hafi einhver upplýsingar um hvar þessir munir eru niðurkomnir eru þeir beðnir um að láta lögregluna á Hólmavík vita í síma 450-3722.

Á sunnudagskvöld, þrettánda dag jóla, fór fram sameiginleg þrettándabrenna Ísfirðinga og Bolvíkinga í miðbæ Ísafjarðar.  Talsverð umferð var og margt fólk saman komið. Umferð gekk áfallalaust í tengslum við þessi hátíðarhöld.

Lífæðin FM hóf útsendingar að þessu sinni þann 4. desember s.l. og lauk útsendingum á miðnætti þann 4. janúar með stæl. Fjölmargir gestir lögðu leið sína í hljóðver Lífæðarinnar FM, síðasta útsendingarkvöldið, og var mikið sungið og trallað og sannkölluð hátíðarstemning ríkti í hljóðveri útvarpsins þegar útsendingum lauk að þessu sinni. 

Í fréttatilkynningu frá Þórði Vagnssyni útvarpsstjóra segir að þegar slökkt var á útsendingum útvarpsins, með formlegum hætti, á slaginu tólf á miðnætti, var ekki laust við að viðstaddir og hlustendur Lífæðarinnar FM, felldu tár og mátti greinilega sjá að miklar tilfinningar fylgdu síðustu sporunum í þessa risavaxna verkefni, enda óendanleg vinna sem fylgdi útvarpsrekstrinum að þessu sinni....
Meira

"Stígum fastar á fjöl - spörum ei vorn skó" mun sjálfsagt óma við álfadansinn sem fram fer á Eyrartúninu framan við Safnahúsið kl 20 í kvöld. Tilefnið er að sjálfsögðu hin árlega þrettándagleði sem að þessu sinni fer fram á Ísafirði - en undanfarin ár hefur álfadansinn verið stiginn til skiptis á Ísafirði og í Bolungarvík. 

Þrettándagleðin hefst með skrúðgöngu undir forystu álfakóngs og álfadrottningar. Á eftir þeim koma álfarnir uppábúnir, þá bændur og búalið en púkar og jólasveinar munu reka lestina. Búast má við að Grýla og Leppalúði verði einnig á ferðinni. 

Lúðrasveit Tónlistarskólans mun spila jóla- og áramótalög á undan álfadansinum sem stiginn verður umhverfis bálið að venju. Eftir dansinn verður gengið fylktu liði að Hlíf og síðan niður að Neista þar sem endað verður með flugeldasýningu.

Það er Kvenfélagið Hlíf sem sér um þrettándagleðina að vanda með aðstoð Skátafélagsins, Björgunarfélagsins, Ísafjarðarbæjar, Harmonikkufélagsins, Lúðrasveitar Tónlsitarskólans, Kómedíuleikhússins, félaga úr Litla Leikklúbbnum auk ýmissa einstaklinga. Má ætla að um 100 manns komi að undirbúningi þrettándagleðinnar með einhverjum hætti. 

Ísafjarðarbær mætir Akranesi í annarri umferð sjónvarpskeppninni Útsvari næstkomandi á föstudag. Liðsmenn ísfirska liðsins segja að keppnin leggist vel í þá, en þau mæti vongóð til leiks og staðráðin í að gera sitt besta.  Liðið er skipað þeim Halldóri Smárasyni menntaskólanema, Ólínu Þorvarðardóttur þjófræðingi og Ragnhildi Sverrisdóttur blaðamanni. Þau kepptu við Reykjanesbæ í fyrstu umferð og unnu þá viðureign með 80 stigum gegn 45, sem var næstmesti stigafjöldi fyrri umferðar. Áður höfðu Akureyringar hlotið 102 stig í fyrstu umferð. Í annarri umferð kepptu Akureyringar við Grindavík og unnu þá viðureign með 67 stigum gegn 57....
Meira

Félagsmálaráðherra hefur ákveðið úthlutun á 250 m.kr. til að koma til móts við þau sveitarfélög sem verða fyrir tekjumissi vegna tímabundins samdráttar í aflamarki þorsks. Um er að ræða fyrsta hluta af þremur en ríkisstjórnin hafði ákveðið að veita samtals 750 m.kr. í þessu skyni á þremur árum og er það hluti af mótvægisaðgerðum vegna niðurskurðar í aflaheimildum á þorski.  Ísafjarðarbær fær mest vestfirskra sveitarfélaga eða rúmar 15,4 m.kr., Bolungarvíkurkaupstaður tæpar 8 m.kr., Vesturbyggð 6,1 m.kr., Tálknafjarðarhreppur 3,7 m.kr., Kaldrananeshreppur 1,4 m.kr., Súðavíkurhreppur 1,3 m.kr, Strandabyggð fær 550 þús og Árneshreppur 500 þús....
Meira

Staðið verður við samkomulag sem gert var við bóndann í Hvestu í fyrrasumar, um að olíuhreinsistöð verði reist þar, komi ekki eitthvað uppá sem mæli gegn því á lokastigi málsins, sagði Hilmar Foss hjá Íslenskum Hátækniiðnaði í samtali við ríkisútvarpið í gær. Þar kom einnig fram að fagaðilar, frá tveimur fyrirtækjum, annars vegar Línuhönnun og erlendis frá, munu í janúar skoða þá staði sem horft hefur verið til,  en það eru Hvesta í Arnarfirði eða Sandar og Hólar í Dýrafirði. Verður í framhaldi af því tekin ákvörðun hvor staðurinn verði fyrir valinu....
Meira

Aðalfundur verkalýðsfélagsins Baldurs á Ísafirði sem er deild í Verkalýðsfélagi Vestfirðinga mótmælir sölu á leiguíbúðum Ísafjarðarbæjar á Hlíf, dvalarheimili aldraðra á Ísafirði, og telur hana skerða möguleika eldri félagsmanna stórlega.  Deildaraðalfundur Baldurs var haldinn föstudaginn 28. desember sl.  Á fundinum var kosin stjórn ásamt varamönnum:  Aðalmenn Ólafur Baldursson formaður, Kári Þ. Jóhannsson varaformaður og Guðný Á. Skúladóttir ritari.  Varamenn Guðrún Kristjánsdóttir, Ari Sigurjónsson og Valdimar S. Gunnarsson.  Umræður um atvinnu- og kjaramál var helst á dagskrá svo og staðan í samningamálum. Þá samþykkti fundurinn að senda frá sér eftirfarandi ályktun:

"Deildaraðalfundur Vlf. Baldurs skorar á samninganefnd SGS (Starfsgreinasambandsins) að standa fast við sanngjarnar og hógværar kröfur aðildarfélaganna gagnvart atvinnurekendum við gerð nýrra kjarasamninga. Þá fagnar fundurinn þeirri vinnu sem komin er af stað í atvinnumálum til fjölgunar nýrra starfa í fjórðungnum. Þess er vænst að framkomnar tillögur skili okkur fjölbreyttari vinnumarkaði með auknum tækifærum til hagsbóta fyrir launþega á Vestfjörðum. Þá mótmælir fundurinn þeirri ákvörðun Ísafjarðarbæjar að selja leiguíbúðir í eigu bæjarins á Hlíf, dvalarheimili aldraðra, með því verði möguleikar eldri félagsmanna til húsnæðis stórlega skertir. "  Þetta kemur fram á vef Verkalýðsfélags Vestfirðinga.

Samkvæmt yfirliti Jóns G. Guðjónssonar veðurathugunarmanns í Litlu-Ávík í Trékyllisvík í Árneshreppi var desember umhleypingasamur líkt og haustmánuðir síðasta árs. Hvassviðrasamt var í desembermánuði og oft stormur. Þó var hægviðri að mestu milli 4. og 10. dags mánaðarins. Verst var veðrið að morgni þess þrettánda og náði vindhæð þá 12 gömlum vindstigum eða 36 metrum á sekúndu.  Mestur hiti mældist 12,2 gráður þann 18. desember, en mest frost var þann 28. síðastliðinn, 6,9 stig á mælinum í LItlu-Ávík.  Úrkomulaust var aðeins í fjóra daga, en alls mældist úrkoman á mánuðinum 116 mm. Jörð var talin auð í 11 daga en alhvít í 10 daga og mestur snjór mældist dagana 28. og 29. desember....
Meira

Guðmundur Gíslason sigraði í  jólahraðskákmóti Taflfélags Ísafjarðar. Fjórtán skákmenn tóku þátt í mótinu sem haldið var 29. desember síðastliðinn. Guðmundur lagði alla andstæðinga sína að velli og hlaut þrettán vinninga. Í öðru sæti varð Unnsteinn Sigurjónsson með 12 vinninga og í þriðja sæti Smári Haraldsson með 10 vinninga. Af unglingum stóð sig best Jakob Kozlowski.  Tefld var einföld umverð, 5 mínútur á mann í hverri skák.

Þrír efstu menn og sigurvegari unglinga fengu veglega vinninga. Voru vinningarnir gefnir af fyrirtækjum á Ísafirði. Voru þetta fyrirtækin Fernandos, Hafnarbúðin, Hamraborg, Húsasmiðjan, Jón og Gunna og Penninn. Þá fékk jólahraðskákmeistarinn og unglingameistarinn farandbikara, sem gefnir voru af fyrirtækinu Ísinn á Ísafirði.  Að auki styrkti Sparisjóður Vestfirðinga mótið.

Mótið þótti takast vel og þjappaði það skákmönnum á svæðinu betur saman. Eru þeir staðráðnir í að auka veg skáklistarinnar á næsta ári. Vikulegar æfingar eru á mánudagskvöldum í Guðmundarbúð á Ísafirði. Þangað eru allir velkomnir og er þátttaka ókeypis. Taflfélag Ísafjarðar hvetur allt skákáhugafólk til að mæta á skákæfingar.

Lögreglan á Vestfjörðum hefur haft í nógu að snúast vegna rysjótts veðurfars að undanförnu og hafa flest verkefni hennar síðustu viku verið vegna umferðaróhappa en talsverð hálka hefur myndast þegar regn hefur fallið á freðna jörð.  Á laugardagsmorgun var tilkynnt um vöruflutningabifreið sem hafði runnið í hálku og lokaði vegnum um Eyrarfjall í Ísafjarðardjúpi. Björgunarsveitarmenn fóru frá Ísafirði ásamt vörubifreið með krana og náðu þeir að færa vöruflutningabifreiðina til þannig að hægt var að aka henni áfram og var vegurinn opnaður aftur um miðjan dag. Tvö vélsleðaóhöpp voru í umdæminu. Á föstudag féll maður af vélsleða á Þorskafjarðarheiði og á laugardag ók maður vélsleða á stein rétt utan við Hólmavík og kastaðist af sleðanum. Talið var að hann væri alvarlega slasaður og var hann fluttur með þyrlu á sjúkahús í Reykjavík. Ökumaður sleðans var ekki með öryggishjálm er slysið varð....
Meira