Núverandi kvótakerfi hefur þjónað Reykjavík best. Aflahlutdeild Reykjavíkur hefur aukist um 86% frá því frjálst framsal kvóta var leitt í lög árið 1991. Þá var aflahlutdeild útgerða í Reykjavík 7,7% en var á síðasta fiskveiðiári 14,4%. Aflahlutdeild Reykjavíkur var 44.000 þorskígildistonn fiskveiðiárið 2010/2011. Þetta þýðir að kvóti Reykvíkinga er 20 þúsund þorskígildistonnum meiri, en hann hefði verið árið 1991. Það er mesta aukning í einu sveitarfélagi frá þeim tíma. Önnur sveitarfélög sem hafa bætt verulega við sig kvóta eru Grindavík, Snæfellsbær og Skagafjörður. Þeir sem tapað hafa á kvótakerfinu frá 1991-2011 eru Vestfirðir, mest byggðarlög í Ísafjarðarbæ, en einnig Bíldudalur, Hólmavík, Drangsnes og Súðavík. Þá hefur Fjarðabyggð fyrir austan, Sandgerði, Keflavík og Vopnafjörður tapað stórum hluta af sínum kvóta frá 1991.

Aflahlutdeild Reykjavíkur, Hafnarfjarðar, Akraness er samtals 22,4%, aflahlutdeild sveitarfélaga á Suðurnesjum er 13,7% og samtals gerir það rúmlega 36% af öllum kvóta á Íslandsmiðum.
...
Meira

Fulltrúar Vegagerðarinnar og Suðurverks hf. skrifuðu í gær undir samning um vegagerð á um 16 kílómetra kafla af Vestfjarðavegi (60) í Barðastrandarsýslu. Eiði - Þverá. Núverandi vegarkafli frá Þverá í Kjálkafirði að Eiði í Vattarfirði er 24 km malarvegur. Stytting nýs vegar kemur til vegna þverana tveggja fjarða, Kjálkafjarðar og Mjófjarðar. Suðurverk hefst þegar handa við verkið og má búast við að það sjáist á verkstað með tæki sín og tól eftir 10 - 14 daga. Nú þegar er prammi sem notaður verður við þveranirnar á leiðinni frá Noregi en Suðurverk hefur lánað hann út til verka þar.

Suðurverk átti næstlægsta boðið í verkið en lægstbjóðandi stóðst ekki kröfur Vegagerðarinnar til verks af þessari gerð. Suðurverk bauð tæplega 2,5 milljarða króna en áætlaður verktakakostnaður var tæpir 2,6 milljarðar króna. Verktakakostnaður er einungis hluti kostnaður við verkið, einsog alltaf, en heildarkostnaður er líklegt að verði um 3 milljarðar króna. Verkið verður unnið á næstu þremur árum. Kynningarskýrslu framkvæmdarinnar má finna á vef Vegagerðarinnar.

Á kaffihúsinu góða, Bræðraborg í Aðalstræti á Ísafirði, sýnir myndlistarkonan Marsibil G. Kristjánsdóttir teikningar gerðar við úrval ljóða eftir vestfirsk skáld. Sýningin nefnist Ljóð í mynd og er um sölusýningu að ræða. Sýningin opnaði á skírdag og lýkur í dag. Meðal skálda sem eiga ljóð í sýningunni eru Steinn Steinarr, Halla Eyjólfsdóttir, Jón úr Vör, Ingimar Júlíusson, Guðmundur Ingi Kristjánsson og Steingerður Guðmundsdóttur. Menningarráð Vestfjarða styrkir sýninguna.

Strandveiðar hófust í gær. Þetta er fjórða sumarið sem strandveiðarnar standa, eftir að þær hófust á ný árið 2009. Fyrirkomulag veiðanna er það sama og í fyrra, róa má fjóra daga vikunnar og landinu er skipt í fjögur svæði. Flestir bátarnir eru skráðir á vestursvæðið, sem nær frá Snæfellsnesi að Hornströndum. Mikið líf færðist í hafnir á vestanverðu landinu í gær, þegar bátarnir fóru í fyrsta róðurinn. Þannig fórum um 50 bátar á sjó frá Bolungarvík í gær, segir á fréttavefnum vikari.is. Flestir voru á strandveiðum, en stærri bátarnir voru á línu og dragnót, aðrir á grásleppu og nokkrir sjóstangveiðibátar voru líka á sjó. Það var líflegt við höfnina í Bolungarvík seinnipartinn þegar bátarnir komu að landi. Handfæraveiðin gekk yfirleitt vel. Þorskurinn vænn og karlarnir brosandi....
Meira

Ólafur Ragnar Grímsson, forseti Íslands, fór fögrum orðum um kvótakerfið í ræðu sinni á sjávarútvegssýningunni í Brussel 24. apríl., og sagði meðal annars að það væri ein af ástæðunum fyrir því að Íslendingar hefðu komist betur og fyrr frá efnahagskrísunni sem hófst 2008. Þetta kemur fram á vefsíðunni smugunni.is í gær.  Í fréttatilkynningu frá forsetaembættinu er haft eftir forsetanum að enda þótt deilt sé um ýmsa þætti kvótakerfisins sé ljóst að hinn öflugi sjávarútvegur hafi auðveldað Íslendingum að glíma við afleiðingar fjármálakreppunnar. Í ræðunni, sem flutt var á ensku, segir að kvótakerfið sé ein ástæða þess að Íslendingar hafi komist út úr fjármálakreppunni 2008 fyrr og betur en nokkur hefði búist við. Það sýndi skýrt samband milli þessa fiskveiðistjórnunarkerfis og þess að ná sér eftir bankaáfall.

Vestfirðir - Hjálmar R. Bárðarson, er nafnið á ljósmyndasýningu sem opnar í dag í Gamla sjúkrahúsinu, safnahúsinu á Ísafirði. Á sýningunni eru ljósmyndir Hjálmars R. Bárðarsonar frá Vestfjörðum frá tímabilinu 1932 til 1980. Myndefnið er bæði horfinn tími mannlífs og byggðar í Grunnavíkur- og Sléttuhreppi og hrikalegt landslag Vestfjarða, en einnig nýrri myndir af ferðalögum um Vestfirði. Hjálmar R. Bárðason fyrrum siglingamálastjóri, fæddist á Ísafirði. Hann ferðaðist um Vestfirði allt frá unga aldri og ætíð með ljósmyndavélina um öxl. Nýlega var sýning á ljósmyndum hans í Þjóðminjasafni Íslands og er sýningin hér á Ísafirði hluti af henni. Sýningin á ljósmyndum Hjálmars R. Bárðarsonar stendur til 9. júní....
Meira

Dögun, ný stjórnmálasamtök um réttlæti, sanngirni og lýðræði, hafa verið stofnuð með aðild Hreyfingarinnar, Frjálsynda flokksins og fleiri aðila. Dögun heldur opinn fund um sjávarútvegsmál á Hótel Ísafirði í kvöld klukkan 20.  Framsögumenn á fundinum verða Þór Saari alþingismaður, Guðjón Arnar Kristjánsson fyrrverandi alþingismaður, Lýður Árnason stjórlagaráðsfulltrúi og Margrét Tryggvadóttir alþingismaður.  Fundarstjóri verður Ásthildur Cesil Þórðardóttir garðyrkjustjóri. Auk framsögumanna mun Gílsi H. Halldórsson bæjarfulltrúi Sjálfstæðisflokksins taka þátt í pallborðsumræðum á fundinum.

Dögun hefur beitt sér fyrir undirskriftarsöfnun fyrir þjóðaratkvæðagreiðslu um fiskveiðistjórnunarmálin. Nánar um samtökin á heimasíðu þeirra xdogun.is.

Þjóðsögur og gamanmál að vestan,sem Hemmi Gunn tók saman á vegum Vestfirska forlagsins og komu út í tveim heftum fyrir nokkrum árum, munu verða fyrstu rafbækurnar sem koma frá Vestfjörðum. Vestfirska forlagið í Dýrafirði stofnar nú rafbókadeild til útgáfu á netinu. Guðrún Steinþórsdóttir á Brekku verður deildarstjóri hinnar nýju rafbókadeildar Vestfirska forlagsins. Fyrirhugað er að setja sem flestar af eldri bókum forlagsins á rafbækur til að þjónusta þá lesendur sem þess óska og vilja fylgjast með þróuninni á því sviði.  Nina Ivanova mun sjá um allt umbrot og tæknivinnu á rafbókum forlagsins, en hún hefur í nokkur ár séð um umbrot á útgáfubókum þess. Eiginmaður Nínu, Ómar Smári Kristinsson, verður aðstoðarmaður hennar svo sem verið hefur.

 

Eins og mörgum er kunnugt er mjög einfalt að tileinka sér rafbókatæknina. Menn kaupa sér lesara, sem yfirleitt kosta á bilinu 25-30 þúsund krónur og síðan rafbækur að vild, en verð á þeim er misjafnt, allt frá 4000- 5000 krónum niður í 800- 900 krónur og jafnvel minna. Öll viðskipti með rafbækur fara fram á netinu á rafrænan hátt eins og nafnið bendir til. Þetta er vistvænn og hagkvæmur kostur.

Fjölmargir tóku þátt í kröfugöngu verkalýðsfélaganna á Ísafirði í gær. Krafa dagsins var Vinna er velferð. Staða landsbyggðarinnar var ræðumönnum ofarlega í huga. Á fréttavefnum vestur.is segir: ,,Ræðumaður dagsins var Björn Snæbjörnsson, formaður Einingar-Iðju og Starfsgreinasambandsins. Björn gerði launamun kynjanna að umtalsefni auk þess að ýtreka það að landsbyggðin þurfi að standa saman, á meðan landsbyggðin berst um hvar næstu göng skulu gerð, er það notað gegn okkur að við getum ekki komið okkur saman um næstu göng og því er ekkert gert. þá lýsti hann yfir vonbrigðum með að ekki hafi gengið betur að koma atvinnulífinu af stað, þar sem ekki er hægt að framfleita sér í dag án atvinnu....
Meira

Alþjóðlegur baráttudagur verkalýðsins er í dag. Kröfugöngur og baráttufundir fara fram víða um land. Á Ísafirði fer kröfugangan frá Baldurshúsinu, Pólgötu 2, klukkan 14. Að henni lokinni verður dagskrá í Edinborgarhúsinu, þar sem Björn Snæbjörnsson formaður Starfsgreinasambands Íslands flytur aðalræðuna. Á Suðureyri fer kröfugangan frá Brekkukoti klukkan 14, boðsund verður í Sundlauginni og kaffiveitingar í Félagsheimilinu, með ræðu og söng. Á báðum fundunum á Ísafirði og Suðureyri mun Elfar Logi Hannesson leikari og leikstjóri flytja frumsaminn leikþátt úr starfi verkalýðshreyfingarinnar á Vestfjörðum, sem nefnist Í vinnufötum og slitnum skóm. Dagskrá dagsins á Ísafirði er þessi:...
Meira