Í fyrsta vísindaporti þessa hausts mun Dr. William R. Short fjalla um nokkrar hliðar drengskaparreglna íslenskra miðalda með dæmum úr bók sinni Sagas of Icelanders.  Vísindaportið hefst að vanda kl12.10 og fer fram á kaffistofu háskólaseturs. Allir eru velkomnir.  Drengsskapareiðir stríðsmanna tíðkuðust í ýmsum samfélögum í gegnum tíðina. Ákveðnar reglur og lög sem stríðsmenn fylgdu í orustum. Miðaldasamfélagið á Íslandi var bændasamfélag en ekki samfélag stríðsmanna, engu að síður benda Íslendingasögurnar til þess að í þessu samfélagi hafi verið farið eftir mjög ströngum drengskapareiðum þegar til átaka kom. Heiðarlegir menn sem fóru eftir þessum reglum voru dáðir og kallaðir drengir en óheiðarlegir menn sem ekki fóru eftir þessum reglum voru kallaðir níðingar.

Skilningur á drengskaparreglum bardagamanna og hvernig þessar reglur leiðbeindu þeim í óreiðu, hávaða og sársauka orustunnar hjálpar okkur að skilja betur menningu og samfélaga fólks á miðöldum á Íslandi.  Dr. Short er sjálfstætt starfandi fræðimaður og rithöfundur sem hefur sérhæft sig í íslensku miðaldasamfélagi. Flestar rannsóknir sínar hefur hann unnið við stríðsminjasafnið Higgins Armory Museum í Worcester í Massachusetts í Bandaríkjunum. Hann heldur reglulega fyrirlestra um vopn víkinga og hlutverk þeirra í samfélaginu á miðöldum, auk þess að sýna og kenna bardagaaðferðir frá þessum tíma. Nýjustu bækur Dr. Short eru Viking Weapons and Combat Techniques (2009) og Icelanders in the Viking Age (2010). Hann vinnur nú að annari bók þar sem hann sameinar áhuga sinn á Íslendingasögunum vopnum frá þessum tíma. Í bókinni verður sérstaklega fjallað um drengskaparreglur norrænna bardagamanna á miðöldum. Frekari upplýsingar má finna á vefsíðu Williams.

Deila á Facebook