Mikilvægum áfanga í sorpmálum Ísafjarðarbæjar var náð í gær þegar samþykkt var í bæjarstjórn að bjóða út sorphirðu, urðun og förgun í bænum. Tekin var fyrir tillaga nefndar um sorpmál sem laut að útboði sorphirðu og sorpförgunar, en nefndin hefur
lagt á það áherslu við gerð útboðsgagna að náð verði fram aukinni flokkun, hagkvæmni, endurvinnslu og endurnýtingu.  Bæjarfulltrúar Í-listans í Ísafjarðarbæ lögðu fram bókun, þar sem lagt var til að útboðinu yrði skipt í tvo hluta, annarsvegar sorphirðu og hinsvegar urðun og förgun, þar sem með því væri meiri möguleiki á að verktakar í héraði geti tekið þátt í útboðinu.

Sorpmál Ísafjarðarbæjar hafa verið talsvert í umræðunni á síðustu árum. Ljóst er að gera þarf talsverðar endurbætur á sorpbrennslustöðinni Funa í Engidal eigi að reka hana áfram. Þá verða flokkun, endurnýting, jarðgerð og þess háttar förgun hátt metin við mat á tilboðum.  Í tilkynningu frá Ísafjarðarbæ er vonast til að með þessari ákvörðun verði stórt skref stigið í þá átt að eyða óvissu sem ríkt hefur í sorpmálum Ísafjarðarbæjar um árabil og að flokkun og endurvinnsla verði stóraukin í framtíðinni í samráði og samstarfi við íbúa bæjarins.

 

Deila á Facebook