Meirihluti svokallaðrar sáttanefndar, fulltrúar hagsmunaaðila í sjávarútvegi og stuðningsmenn núverandi kvótakerfis, reyna að eigna sér niðurstöðu nefndarinnar og vilja fara svokallaða samningaleið, sem tryggir núverandi kvótahöfum aðgang að fiskveiðiauðlindinni til næstu kynslóða.  Guðbjartur Hannesson formaður nefndarinnar segir að vinna verði áfram að málinu eftir skýrslu nefndarinnar og margt sé óljóst um útfærslu á þeim leiðum sem nefndin fjallaði um. Gert er ráð fyrir að ríkisstjórnin skipi nefnd til að semja frumvarp til nýrra fiskveiðilaga í framhaldi af skýrslu nefndarinnar.

Nefnd um endurskoðun fiskveiðilöggjafarinnar sem Jón Bjarnason sjávarútvegsráðherra skipaði fyrir ári síðan með fulltrúum allra stjórnmálaflokka og hagsmunaaðila í sjávarútvegi hefur skilað af sér skýrslu til ráðherra. Guðbjartur Hannesson alþingismaður og nú ráðherra stýrði nefndinni, sem kölluð hefur verið sáttanefnd.  Guðbjartur segir í viðtali við vísi.is í dag: „Það er meginniðurstaða hópsins að skoða ákveðnar hugmyndir en ég lít svo á að það sé svo margt óljóst hvernig það verður útfært þannig að það verður heilmikil framhaldsvinna til að komast að niðurstöðu í málinu," segir Guðbjartur.

Í skýrslu nefndarinnar er mest fjallað um tvær leiðir til að innkalla og endurúthluta aflaheimildum í framtíðinni. Önnur leiðin er kölluð samningaleið og þar er gert ráð fyrir að núverandi kvótahafar fái forgang til afnotasamninga á aflaheimildum til ákveðins árafjölda, 15-25 ára.  Hin leiðin er kölluð tilboðsleið, en hún felur í sér innköllun og útleigu með fyrningu, þannig að ákveðinn hluti veiðiheimilda komi inn á markað á hverju ári.  Meirihluti nefnarinnar, fulltrúar útvegsmanna og stuðningsmenn núverandi kvótakerfis mæla með samningsleið, en minnihluti nefndarinnar hallast að tilboðsleið.

Það er ljóst að hagsmunaaðilar í sjávarútvegi sem tengjast kvótakerfinu og pólitískir bandamenn þeirra í Sjálfstæðisflokki og Framsóknarflokki vilja fara samningsleið og að leigutíminn verði margir áratugir. Þannig hefur Einar Kr. Guðfinnsson þingmaður Sjálfstæðisflokksins og einn nefndarmanna sent frá sér yfirlýsingu sem birtist á dv.is, þar sem hann heldur því fram að nefndin sé sammála um að mæla með samningsleiðinni. Þar segir hann líka: „Mjög mikilvægt er að samningarnir verði til langs tíma, rétt eins og gilda mun við nýtingu orkuauðlinda sem ekki eru í einkaeigu."
Deila á Facebook