4,5 milljónir króna fara til uppbyggingar fyrir ferðamenn í Flatey á Breiðafirði og 1,5 milljón til að gera Lónið á Suðureyri aðgengilegt. Þetta er meðal þeirra 30 verkefna sem fengu úthlutað úr Framkvæmdasjóði ferðamannastaða í vikunni. Þetta var fyrsta úthlutun úr sjóðnum. Katrín Jakobsdóttir iðnaðarráðherra staðfesti tillögu stjórnar sjóðsins að upphæð 69 milljónir króna. Alls bárust 124 umsóknir og nam heildarupphæð styrkumsókna tæpum 455 milljónum króna.

Fram kemur á vef Iðnaðarráðuneytis að þrjú verkefni á Vestfjörðum fá styrk. Framfarafélag Flateyjar fær 2.000.000 krónur til til stígagerðar, hönnunar og uppsetningar upplýsingaskilta og merkinga í Flatey á Breiðafirði.  Þá fær Þrísker ehf. 2.500.000 krónur til að ljúka viðgerð á þaki og ytra byrði gamla Frystihússins í Flatey. Þriðji styrkinn til Vestfjarða fær Sjávarþorpið Suðureyri ehf., 1.500.000 krónur, til að bæta aðgengi að lóninu á Suðureyri, fyrir hönnun og efniskostnaði á bryggju, grjótvarnargarði, uppfyllingu og stíg samkvæmt fyrirliggjandi deiliskipulagi.

Verkefnin sem hljóta styrki eru fjölbreytt og kennir þar ýmissa grasa. Öll eiga þau þó það sameiginlegt að stuðla að uppbyggingu, viðhaldi og verndun ferðamannastaða í opinberri eigu eða umsjón um land allt. Þriðjungur styrkþega fékk þá upphæð sem þeir sóttu um, en aðrir fengu styrk til ákveðinna verkþátta og eru styrkupphæðirnar á bilinu 250 þúsund til 5 milljóna króna. Hæstu styrkina fá Umhverfisstofnun vegna hönnunarsamkeppni um Gullfosssvæðið, Rangárþing ytra til að vinna samræmt ramma‐ eða svæðisskipulag fyrir Fjallabakssvæðið og Rangárþing eystra vegna framkvæmda við nýjan útsýnispall við Skógafoss.

Deila á Facebook