Fulltrúar íslenskra fiskimanna mótmæla við sjávarútvegsráðuneytið síðatliðið haust. Mynd ruv.is

Fulltrúar frá Samtökum íslenskra fiskimanna (SÍF) gengu á fund mannréttindafulltrúa Evrópuráðsins Thomas Hammarberg fyrir stuttu síðan. Á fundinum gerðu fulltrúar íslenskrar sjómannastéttar Thomas Hammerberg grein fyrir því að enn væru íslensk stjórnvöld ekki búin að bregðast við áliti Mannréttindanefndar Sameinuðu þjóðanna frá 12. desember 2007 og gert breytingar á núverandi fiskveiðistjórnunarkerfi í samræmi við kröfur Mannréttindanefndarinnar. Stór hluti fundarins snerist um íslenska fiskveiðistjórnkerfið og stöðu þess gagnvart alþjóðlegum mannréttindasáttmálum sem Ísland hefur undirgengist, þar á meðal gagnvart Mannréttindasáttmála Evrópu. Thomas Hammerberg var vægt til orða tekið áhugasamur um allt sem við kemur málinu og óskaði sérstaklega eftir að fá skýrslu um það, sem mun verða send honum á næstunni.

Fulltrúar SÍF sem fóru á fund Mannréttindanefndarinnar voru Birgir Haukdal Rúnarsson, Baldur Þórir Gíslason, Þórður Már Jónsson, Lúðvík Emil Kaaber og Grétar Mar Jónsson. Fram kemur í tilkynningu frá stjórn Sambands íslenskra fiskimanna að jafnvel þó að enginn fulltrúi frá íslenskum fjölmiðlum hafi verið á fundinum, hafi þeim engu að síður tekist að senda frá sér afar villandi fréttir um efni fundarins.