282. fundur bæjarstjórnar Ísafjarðarbæjar verður haldinn í Stjórnsýsluhúsinu á Ísafirði fimmtudaginn 2. september 2010 og hefst kl. 17:00.

Hin árlega Þríþraut Vasa 2000 og Heilsubæjarins Bolungarvíkur hefst í sundlaug Bolungarvíkur kl.10.00.

700m sund (42 ferðir) í sundlaug Bolungarvíkur. Hjólað 17 km. Bolungarvík - Ísafjörður. Hlaup, 7 km. Landsbankaplan - Holtahverfi - Landsbankaplan Ísafirði.

Íslandsmótið 2. deild: Laugardagur 4. september kl. 14.00:
BÍ/Bolungarvík - Víðir frá Garði.

Blómaval opnar verslun á Ísafirði í dag 9. september 2010 í húsnæði Húsasmiðjunnar Mjallargötu 1. Milli kl. 18 og 20 verður haldið konukvöld í versluninni þar sem boðið verður upp á léttar veitingar og ljúfa tónlist.  Alla konur verða leystar út með gjöf.

Kynningarfundur verður í Friðarsetrinu í Holti í Önundarfirði, fimmtudagskvöld 9. september kl. 20.00. Kynnt verður 12 spora prógrammið. Til að skoða líf sitt, tala, hlusta, þroskast og öðlast betri færni til að takast á við lífið. Fundurinn stendur í tvær klukkustundir.  Frekari upplýsingar á www.viriribata.is eða síma 899 4926 hjá Laufeyju eða 892 1058 hjá Hólmgeiri.

Opið hús verður hjá Leiklistarskóla Kómedíuleikhússins laugardaginn 11. september á milli klukkan 14 og 16 í húsnæði skólans. Leiklistarskóli Kómedíuleikhússins verður settur í fyrsta sinn sunnudaginn 19. september. Skólinn býður upp á fjölmörg námskeið fyrir börn og fullorðna í haust. Skólinn er til húsa í Listakaupstað á Ísafirði (áður hús Norðurtangans) á horni Tangagötu og Fjarðarstrætis, efstu hæð.

Nýtt leikverk verður frumsýnt á vegum Kómedíuleikhússins vestfirska í gömlu hlöðunni á Alviðru í Dýrafirði á föstudagskvöld kl. 21.00. Leikritið nefnist Bjarni á Fönix og fjallar um skútuskipstjórann Bjarna sem lenti í bardaga við 30 Fransmenn um miðja nítjándu öld og eftirmál þess. Það er Ársæl Níelsson sem leikur aðalhlutverkið, en hann er jafnframt annar höfunda verksins ásamt Elfari Loga Hannessyni leikstjóra verksins. Leikmynd og búninga gerir Marsibil G. Kristjánsdóttir.

Íslandsmótið 2. deild, lokaleikur:  BÍ - Víkingur Ólafsvík.  Laugardaginn 14. september kl. 14.00.

Skúli mennski, eða ísfirski trúbadúrinn Skúli Þórðarason, spilar og leikur af fingrum fram í Tjöruhúsinu á Ísafirði, laugardagskvöld 18. september frá klukkan 20.00.

Bjarni á Fönix er nýtt leikverk á vegum Kómedíuleikhússins vestfirska.  Önnur sýning á veitingahúsinu Talisman á Suðureyri laugardagskvöld 18. setpember kl. 21.00.  Bjarni á Fönix og fjallar um skútuskipstjórann Bjarna sem lenti í bardaga við 30 Fransmenn um miðja nítjándu öld og eftirála þess. Það er Ársæl Níelsson sem leikur aðalhlutverkið, en hann er jafnframt annar höfunda verksins ásamt Elfari Loga Hannessyni leikstjóra verksins. Leikmynd og búninga gerir Marsibil G. Kristjánsdóttir. Bjarni á Fönix er fyrsta frumsýning Kómedíuleikhússins á nýbyrjuðu leikári.

Guðsþjónusta í Ísafjarðarkirkju sunnudaginn 19. september kl. 11.00.  Prestur séra Magnús Erlingsson.

Vígsla jarðganganna um Óshlíð hefst kl. 10.15 með því að minnisvarði um ástvini sem farist hafa af slysförum verður afhjúpaður við Skarfasker í Hnífsdal. Klukkan hálfellefu gefst hlaupurum og skokkurum einstakt tækifæri til að hlaupa í gegnum göngin, áður en umferð verður hleypt að. Yngri hlauparar geta hlaupið styttri vegalengd Bolungarvíkurmegin. Sjálf vígsluathöfnin byrjar 13.30 við gangnamunnann í Bolungarvík og um hálftíma síðar mun bílalestin fara af stað gegnum göngin. Í enda ganganna í Hnífsdal er gert ráð fyrir að bæjarstjórar Ísafjarðarbæjar og Bolungarvíkur muni mætast og eftir það verða göngin opnuð fyrir umferð. Hátíðahöld verða að því loknu í íþróttahúsinu í Bolungarvík þar sem allir eru velkomnir. Þar verða væntanlega fluttar margar ræður, en einnig leikin tónlist og boðið upp á veitingar.

Guðsþjónusta á Hlíf á Ísafirði sunnudaginn 26. september kl. 14.00. Prestur séra Magnús Erlingsson.

Leiksýningin Gaggað í grjótinu verður sýnd í Melrakkasetri Súðavík, sunnudaginn 26. september kl. 17.00.  Það er Elfar Logi Hannesson og Kómedíuleikhúsið sem setur upp sýninguna.  Tilvalið fyrir alla að kíkja við í Melrakkasetrinu.

Hverfult haf, A Sea Change (Heimildamynd) Barbara Ettinger (USA) 2009 85 min.  Ímyndið ykkur veröld án fiskjar. Vísindamenn hafa að undanförnu tekið eftir hækkun sýrustigs í heimshöfunum sem gæti leitt til hruns á fiskimiðum. Ástandið gæti varað í milljónir ára. Þegar hinn norsk-bandaríski Sven Huseby heyrði fyrst af vandamálinu einsetti hann sér að finna bæði svör og lausnir á því. Sven fer um allan heim og hittir vísindamenn, aðgerðasinna og frumkvöðla sem vinna allir að því að koma í veg fyrir að allt fari á versta veg.  A Sea Change hefur verið sýnd á kvikmyndahátíðum um allan heim og hlotið fjölmörg verðlaun, enda varpar hún ljósi á lítt þekkta en afar dökka hlið umhverfismála.

Sonur arnarfangarans, Eagle´s Hunter son (Dan, Þýskal og Sví) Barnamynd með enskum texta en mjög myndræn. Leikstjóri: Réne Bo Hansen, 97 min.  Bazarabai, sem er 12 ára, er ekki eins og aðrir hirðingjastrákar. Hann langar til að yfirgefa grænar lendur Vestur- Mongólíu og setjast að í borginni Ulan Bator. En faðir hans vill að hann feti í fótspor sín. Á mikilli arnarhátíð flýgur verðlaunaörn föðurins á brott og Bazarabai ákveður að elta. Úr verður ævintýraleg eftirför sem á endanum leiðir hann til Ulan Bator.

Konungar sætabrauðsins - Kings of pastry. Leikstjórar: Chris Hegedus og D.A. Pennebaker (USA/UK/HOL) 2009 86 mín. Sextán franskir eftirréttameistarar koma saman í Lyon til að taka þátt í virtri maraþon-baksturskeppni. Þeir fórna fjölskyldu sinni og fjármunum í von um að vinna og verða útnefndir hinir bestu af Frakklandsforseta. Keppnin er haldin fjórða hvert ár, líkt og Ólympíuleikarnir, og keppendur þurfa ekki einungis að búa yfir einstökum hæfileikum og stáltaugum, heldur einnig hafa talsvert magn af lukku í farteskinu. Þeir eru undir stöðugri smásjá dómara, keppa við klukkuna og þurfa að endingu að bera sköpunarverk sín langa leið að hlaðborði, án þess að missa þau. Myndin lýsir hinum dramatíska tilfinningaskala sem keppendur ganga í gegnum á leið sinni að titlinum „Konungur sætabrauðsins?.

Hvernig sumrinu lauk, How I ended this summer, mynd eftir Kak Ya Provel, Etim Letom og Alexei Popogrebsky (RUS) 2010 124 min.  Á afskekktri eyju í Norður-Íshafinu er dagurinn margar vikur að líða, enda sest sólin aldrei á sumrin á svo norðlægum slóðum. Á eyjunni var eitt sinn mikilvæg rannsóknarstöð en nú starfa þar aðeins tveir menn, þeir Sergei, reyndur veðurfræðingur, og Pavel, sem er nýútskrifaður úr framhaldsskóla. Von er á skipi til að sækja þá félaga og verða það mikil tímamót í lífi Sergeis, enda hefur hann dvalið á staðnum í mörg ár og hlakkar mikið til að snúa aftur til eiginkonu sinnar og barns. Pavel vonar hins vegar að hann fái tækifæri til að upplifa ævintýri á borð við þau sem hann dreymdi um þegar hann gerðist sjálfboðaliði á þessum sérstaka stað. Dag einn þegar Sergei er úti á veiðum heyrir Pavel hins vegar talstöðvarskilaboð sem hann vill helst ekki koma áleiðis til Sergeis.